حُب النفس

إبحث عن الحل داخل نفسك

مو عشان أنت ما تثق بالناس إلي حولينك، بس عشان أنت الأدرى بنفسك

عشان لو منجد فيه مشكلة؛ فحتبان مرة كويس لو درستها بنفسك

 فتش عنها جواتك.. حاول تحلها بنفسك الأول قبل ما تلجأ للآخرين.. 

أفهم نفسك قبل ما تخلي أحد يفرض عليك حقيقة.. بعيدة تماماً عنك.. 

بس الطريقة التي تعالج بيها دي المشكلة مرة مهمة،

لاتنظر بقسوة أو تأنيب ضمير لنفسك..

كون متسامح لأبعد حد ممكن،، عشان لو أنت ما دلعت نفسك وسامحتها، مين حيسامحها؟

أعطي نفسك فرصة ورا فرصة ورا فرصة.. ولاتيأس أبدا..

شوف نفسك كيف بتصارع عشان الحياة والوظيفة والترقية.. تصارع عشان رضا الناس عنك.. ليش ماتسوي نفس الشي لنفسك؟ تحبها وتحتويها وتصارع عشان ترضيها..

المقصود بنفسكفي هذا السياق، هو أشياء كثير.. بس كلها تهمك.

قلبك، تفكيرك، عقلك، حالتك العقلية والنفسية، وروحك.

لاتتردد في إنك تسامح نفسك كل يوم.. على كل الأغلاط اللي تسويها.. حقيقي كل يوم.. سامح نفسك على الغلط اللي قلت انك محتكرره وكررته..

أعطي نفسك مساحة للخطأ

حب واحتضن نفسك البشرية المعرضة للخطأ.. المعرضة للذنب..

عشان عادي!

مايكفي إنك كل يوم تصحي بقلب نظيف وجديد؟

مايكفي إنك مع كل ساعة جديدة تمر أنت بتجدد نواياك.. نوايا أنك تصير إنسان أحسن وأوعى.

الحياة حوليننا فيها الكثير من الضغوط.. فيها الكثير من التدخلات

فيها الكثير من الإلتزامات، وأنت ما قصرت في لعب دورك بشكل ممتاز وسط كل دي الزحمة

فليش تزود فوق الضغط ضغط وفوق المسوولية مسؤولية أكبر منها؟

وزع أولوياتك.. وخد وقتك.. إنك تنجز وتعيش

وألتزم بالأولوية الأولى المهمة الي تعتمد  حياتك عليها، وبعدها فكر في الاشياء التانية.. مافي شي حيطير.. وخلي اللي يزعل.. يزعل.

أعمل طابور وفلتر للأشياء إلي تباها تدخل حياتك.. فكر كويس قبل ما تلتزم لشخص أنت منك متأكد أنك تبا تقضي حياتك كلها معاه. لا توزع وعود وأماني والتزامات للناس عشان ما تظلم نفسك وتظلمهم.. عيش واستمتع بحياتك..

كون صادق مع نفسك.. عشان كلو حينعكس على غيرك

نظم مخك، نظم حياتك، أكتب، دوّن،

واستسلم من الحينة للحينة.. فلا مشكلة ابداً في ذلك..

Leave a Reply

Your email address will not be published. Required fields are marked *